Fundu búnað tengdan hernaði í farþegaflugvél

Tyrkir segjast hafa fundið samskiptabúnað ætlaðan til hernaðarnota um borð í sýrlenskri farþegaflugvél sem þeir stöðvuðu á miðvikudagskvöld.

Tyrkneski herinn sendi herþotur til móts við vélina, sem var á leið frá Rússlandi til Sýrlands, og neyddi hana til að lenda í Ankara.

Leitað var um borð í vélinni. Auk samskiptabúnaðar fundust þar hlutir sem Ahmet Davutoglo, utanríkisráðherra Tyrklands, segir ekki vera lögmætan farangur í farþegaflugi.

Sýrlendingar hafa harðlega mótmælt þessari aðgerð Tyrkja og Rússar krefja Tyrki um skýringar.

Mohammed Ibrahim Said, samgönguráðherra Sýrlands, segir ákvörðun Tyrkja um að neyða vélina til lendingar jafnast á við flugrán.

Alexander Lukasjevitsj, talsmaður rússneska utanríkisráðuneytisins, segir Rússa reyndar einkum hafa áhyggjur af því að lífi og öryggi farþega hafi verið stofnað í hættu, en á meðal þeirra voru sautján Rússar.

Þá fullyrða Rússar að farmurinn, sem Tyrkir hafa gert upptækan, sé ekki frá þeim kominn.

Vaxandi spenna hefur verið milli Sýrlendinga og Tyrkja síðustu daga vegna átaka á landamærunum, sem tengjast borgarastyrjöldinni í Sýrlandi.