Hefð sem kominn er tími til að breyta

Íslenska karlalandsliðið í fótbolta spilar sinn fyrsta leik í undankeppni HM 2014 á föstudagskvöldið þegar Norðmenn koma í heimsókn á Laugardalsvöllinn. Þetta er fyrsti alvöru landsleikur liðsins undir stjórn Lars Lagerbäck en mikil batamerki hafa verið á liðinu síðan að Svíinn tók við því.

Nú er að sjá hvort Lagerbäck og strákunum takist að afnema leiðinlega hefð hjá íslenska landsliðinu sem hefur ekki náð í stig í fyrsta heimaleiknum á þessari öld. Í undanförnum sex undankeppnum HM eða EM hefur nefnilega fyrsti heimaleikurinn tapast.

Ísland hóf einnig síðustu undankeppni á heimaleik á móti Norðmönnum og lengi vel leit út fyrir að strákunum væri að takast að breyta hefðinni. Heiðar Helguson kom íslenska liðinu í 1-0 á 38. mínútu og Ísland var með undirtökin í fyrri hálfleiknum. Norðmenn skoruðu hins vegar tvö mörk í seinni hálfleik og hirtu öll stigin. Ísland tapaði reyndar fyrstu þremur heimaleikjum sínum í keppninni og stigin komu ekki í hús fyrr en í 1-0 sigri á Kýpur í lokaheimaleiknum sem er einmitt síðasti alvöruleikur strákanna í Laugardalnum.

Íslenska liðið náði stigum í fyrsta leik í undankeppni EM 2008 (3-0 sigur á Norður-Írlandi) og HM 2010 (2-2 jafntefli við Noreg) en báðir leikirnir voru á útivelli. Nokkrum dögum síðar var komið að fyrsta heimaleiknum en þeir töpuðust báðir fyrir Dönum (0-2, EM 2008) og Skotlandi (1-2, HM 2010).

Það eru nú liðin 14 ár síðan að Íslands fékk eitthvað út úr sínum fyrsta heimaleik í undankeppni eða síðan að liðið gerði 1-1 jafntefli við Frakka undir stjórn Guðjóns Þórðarsonar 5. september 1998.

Væntingar til fyrsta leiks hafa verið mismiklar fyrir undankeppnir landsliðsins á þessari öld en góð spilamennska liðsins í vináttuleikjum undir stjórn Lars Lagerbäck á þessu ári sem og sannfærandi sigur á Færeyjum á dögunum gefa tilefni til bjartsýni um að þessi leiðinlega hefð landsliðsins heyri sögunni til eftir föstudagskvöldið.

Fyrsti heimaleikur Íslands í undankeppnum

EM 2000: 1-1 jafntefli við Frakkland

HM 2002: 1-2 tap fyrir Danmörku

EM 2004: 0-2 tap fyrir Skotlandi

HM 2006: 1-3 tap fyrir Búlgaríu

EM 2008: 0-2 tap fyrir Danmörku

HM 2010: 1-2 tap fyrir Skotlandi

EM 2012: 1-2 tap fyrir Noregi