Verne greiði ríkinu 220 milljónir

Verne gagnaver þarf að endurgreiða íslenska ríkinu 220 milljónir króna, samkvæmt ákvörðun ESA, Eftirlitsstofnunar EFTA. Stofnunin segir að um ríkisaðstoð hafi verið að ræða sem brjóti í bága við EES-samninginn og gerir ríkinu að endurheimta féð.

Aðstoðin var veitt árið 2008 þegar Verne keypti fimm byggingar í gömlu herstöðinni við Keflavíkurflugvöll af ríkinu. Kaupverðið var undir markaðsvirði og ESA metur það sem ólögmæta ríkisaðstoð. Því beri fyrirtækinu að greiða 220 milljónir, sem er munur á kaupverði og markaðsverði. Þá telur ESA að undanþágur sem Reykjanesbær veitti árið 2009 frá fasteigna- og gatnagerðargjöldum séu einnig ósamræmanlegar EES-samningnum og þurfi að endurheimta féð frá Verne.

„Við sölu á fasteignum geta yfirvöld með einföldum hætti komist hjá því að veita ríkisaðstoð. Markaðsvirði er hægt að fastsetja annað hvort á grundvelli óskilyrts útboðs eða á grundvelli óháðs sérfræðimats. ESA mun ævinlega fara fram á endurheimtur á allri ótilkynntri ríkisaðstoð sem samræmist ekki EES-samningnum og veitt hefur verið í bága við skyldu yfirvalda til að bíða samþykkis ESA,“ segir Oda Helen Sletnes, forseti ESA.- kóp