Einföld atriði útskýra dræma kjörsókn

Kjörsókn í forsetakjöri hefur aðeins einu sinni verið lakari, árið 2004. Gunnar Helgi Kristinsson, prófessor í stjórmálafræði, segir augljós atriði skýra dræma kjörsókn nú.

?Ég mundi nefna þrennt í þessu sambandi. Í fyrsta lagi að kjörsókn er almennt séð aðeins á niðurleið hjá okkur á Íslandi. Þessi borgaralega vitund um að það sé skylda þín að kjósa er að einhverju leyti að hopa.

Í öðru lagi held ég að kannanir í aðdraganda kosninganna hafi hugsanlega dregið úr kjörsókn. Það var minni spenna því menn vissu nokkurn veginn hvernig þetta myndi fara.

Í þriðja lagi erum við komin verulega inn í sumarleyfistímann. Fólk er farið í sumarfrí og vill nota góðviðrisdag til að fara út úr bænum og sleppir því að kjósa.

Ég tel tilraunir til að reyna að skýra dræma kjörsókn með einhverju öðru frekar langsóttar.?

Gunnar Helgi segir að endurskoða eigi það fyrirkomulag að kjósa um hásumar. ?Þetta bara passar ekki inn í líf fólks. Það ætti að færa kjördag annað hvort fram eða aftur svo hann lendi ekki í sumarleyfistímanum.?

Um sigur Ólafs Ragnars og framhaldið segir Gunnar Helgi að enginn vafi sé á að sigur hans hafi verið sannfærandi.

?Hann er með fylgi eins og kannanir hafa gefið til kynna og jafnvel aðeins betra. Það hljóta að vera Þóru vonbrigði að fá ekki meira fylgi, þó þetta sé svipað fylgi og Vigdís var kosin forseti á árið 1980.?

?Ólafur mun auðvitað getað túlkað þetta þannig að hann hafi lagt sín verk og sín áform á borð fyrir kjósendur. Þau eru að halda áfram á sömu braut, þróa forsetaembættið þannig að hann hafi skoðun á málum, fjalli um mikilvæg málefni eins og utanríkismál, stjórnarskrá og svo framvegis, og beiti málskotsréttinum.?

?Ólafur hefur verið að móta ákveðna kenningu um hvernig hann vilji beita málskotsréttinum. Hún er að þetta sé fyrirkomulag beins lýðræðis þar sem aðeins þurfi ákveðinn fjölda undirskrifta til að framkalla þjóðaratkvæðagreiðslu.?

- bþh