Skrópaði fyrir dómi og mundi svo ekki neitt

„Brotin eru mjög alvarleg og beindust gegn lífi og heilsu brotaþola,“ sagði Margrét Unnur Rögnvaldsdóttir aðstoðarsaksóknari í lokamálflutningi vegna skotárásar sem átti sér stað á lóð bílasölu við Tangabryggju í Reykjavík í nóvember síðastliðnum. Aðalmeðferð málsins lauk um hádegisbil í gær fyrir Héraðsdómi Reykjavíkur og dóms að vænta eftir þrjár til fjórar vikur.

Farið var fram á sex ára fangelsisdóm yfir Kristjáni Halldóri Jenssyni fyrir tilraun til manndráps þegar hann hleypti í tvígang af afsagaðri haglabyssu á bíl með tveimur mönnum innanborðs. Fyrst skaut hann að bílnum á lóð bílasölunnar og svo út um bílglugga eftir eltingarleik við hringtorg við Bíldshöfða.

Margrét Unnur kvað svo þriggja ára fangelsisdóm hæfilegan fyrir Tómas Pálsson Eyþórsson og tvö ár fyrir Axel Má Smith sem gefið er að sök að hafa tekið þátt í árásinni og skipulagningu hennar.

Komið hefur fram fyrir dómi að málið eigi sér rætur í deilum við annað fórnarlamb árásarinnar vegna meintrar skuldar Tómasar. Ákærðu segja ætlan sína bara hafa verið að hræða fórnarlambið frá frekari innheimtuaðgerðum.

Maðurinn sem fyrir árásinni varð var færður fyrir dóm í gærmorgun eftir að hafa skrópað daginn áður. Fyrir dómi bar hann svo við algjöru minnisleysi um nær alla þætti málsins, þar á meðal um skýrslugjöf sína hjá lögreglu strax eftir árásina. Hann hefur einnig fallið frá skaðabótakröfu í málinu.

Hinn maðurinn sem var í bílnum gerir 1,2 milljóna króna skaðabótakröfu vegna árásarinnar. - óká