Lykilvitni mætti ekki fyrir dóm

Fresta varð til dagsins í dag aðalmeðferð í máli þriggja manna sem ákærðir eru fyrir manndrápstilraun í Bryggjuhverfinu í Reykjavík síðasta haust þegar lykilvitni í málinu mætti ekki fyrir dóm í gær. Málið er flutt fyrir Héraðsdómi Reykjavíkur.

Vitnið sem ekki mætti fyrir dóminn var í bílnum sem mennirnir skutu í tvígang á úr haglabyssu. Vitnið er það eina sem á eftir að yfirheyra fyrir dómi.

Við meðferð málsins á mánudag flutti réttargæslumaður vitnisins þau skilaboð að það hefði fallið frá 1,2 milljóna miskabótakröfu vegna málsins. Sá sem einnig var í bílnum hefur ekki fallið frá sinni kröfu.

Þegar vitnið, sem átti að mæta fyrir dóminn klukkan níu í gærmorgun, fannst ekki á heimili sínu var gefin út á hendur því handtökuskipun. Hafi lögregla uppi á vitninu er ráðgert að aðalmeðferð í málinu ljúki í dag.

Árásin sem ákært er fyrir er liður í fíkniefnauppgjöri. Sakborningarnir þrír bera því við að hafa ekki ætlað að meiða neinn með byssunni, bara hræða.- óká