Leiða vatn til átöppunar í Kópavogi

Fyrirtækið Catco vatn ehf. hefur fengið heimild bæjaryfirvalda í Kópavogi til að leggja vatnslögn frá aðveituæð Orkuveitunnar í Reykjavík að iðnaðarhúsnæði í Kópavogi.

Fram kemur í erindi Catco vatns að það sé afsprengi fyrirtækjanna Þórbrunns og síðar Iceland Spring sem enn er nafn vörumerkisins. Mest af vatninu sé selt úr landi.

„Til að mega nota og viðhalda „Spring Water" lindarvatns-skilgreiningunni þarf fyrirtækið að nýta vatn úr lögn sem einungis fyrirtækið hefur aðgang að og því er ekki möguleiki að tengjast dreifikerfi vatns í Kópavogi né öðrum almenningsveitukerfum," segir í erindi Catco vatns.

Catco hyggst tengjast lögn Orkuveitunnar á svæði sem kallast Skyggnir og stytta með því leið vatnsins frá Gvendarbrunnum að verksmiðjuvegg um helming.

Catco segir Orkuveituna telja að slík lögn „ætti að vera tiltölulega lítið verk þar sem rörið yrði grafið niður í óbyggðamóa austan við Breiðholtsbraut og borað undir farveg Elliðaárinnar og ætti því ekki að valda raski á umhverfinu."

Í fundargerð bæjarráðs segir að Catco sé að hluta í eigu erlendra aðila en ekki liggi fyrir nákvæmar upplýsingar um eignarhald eða fjárhagsstöðu fyrirtækisins. - gar