Glysrokkarinn Gary Glitter handtekinn

Hneykslið í kringum fyrrverandi sjónvarpsmann BBC, Jimmy Savile, vatt upp á sig í gær þegar lögreglan handtók glysrokkarann og dæmda barnaníðinginn Gary Glitter.

Hann sló í gegn með laginu Rock & Roll (Part 2) en féll í ónáð í heimalandi sínu Bretlandi eftir að hafa verið dæmdur fyrir barnaníð þar og Víetnam. Hann var leiddur í burt af heimili sínu í gær af lögreglu og fluttur til yfirheyrslu.

Eftir að lögreglan hóf rannsókn á kynferðislegri misnotkun Jimmy Savile, sem stjórnaði hinum vinsælum þáttum Top of the Pops og Jim?ll Fix It, hafa hundruð mögulegra fórnarlamba hans gefið sig fram. Hann er grunaður um að hafa misnotað um þrjú hundruð börn og ungmenni á fjörutíu ára tímabili. Savile lést á síðasta ári, 84 ára gamall. Flest fórnarlömbin segja Savile hafa níðst á sér en einhver segja að Savile og fleiri aðilar hafi gert það.

Glitter er sá fyrsti sem er handtekinn í tengslum við málið. Spurningar hafa vaknað um hvort BBC hafi vitað af kynferðisbrotum Savile en ekkert aðhafst í málinu. Savile mun hafa misnotað fórnarlömb sín bæði í bíl sínum og í búningsherbergi BBC. Eitt vitni segir Glitter hafa misnotað skólastúlku í búningsherberginu á áttunda áratugnum.

BBC hefur sett af stað rannsókn vegna málsins sem nær yfir þau ár sem Savile starfaði þar. - fb