Móðir Y-listans biður Kópavogsbúa afsökunar: Þetta er sorglegt

Ásdís Ólafsdóttir, sem var ein af þeim sem átti frumkvæðið af því að stofna Y-Lista Kópavogsbúa, biður Kópavogsbúa innilegrar afsökunar vegna nýs meirihluta sem nú hefur verið myndaður í bænum. Hún segir Y-listann hafa tekið stóra U beygju frá sínum grunngildum.

Nýr meirihluti í bænum var kynntur síðdegis í dag en hann skipa fulltrúar Sjálfstæðisflokks, Framsóknarflokks og Y-Lista Kópavogsbúa. Ármann Kr. Ólafsson, oddviti sjálfstæðismanna, verður bæjarstjóri bæjarins.

Í yfirlýsingu sem Ásdís sendi fjölmiðlum nú fyrir stundu segir hún að grundvallaratriði flokksins hafi verið að reyna vinna eins vel og hægt væri fyrir Kópavogsbúa. „Í framhaldi af því voru sett grunngildi sem við öll ætluðum að starfa útfrá. Þar vó þyngst siðbót í stjórnsýslu og að bæjarstjórinn yrði ópóilitískur - faglega ráðinn," segir hún í yfirlýsingunni.

Hún segist vera verulega leið yfir því að Y-listinn ætli að taka þátt í meirihlutanum og ætlar hún að segja sig af lista flokksins. „Þetta er sorglegt," segir hún.

Yfirlýsinguna má lesa í heild sinni hér fyrir neðan:

Kópavogur 9. febrúar 2012

Afsökunarbeiðni til Kópavogsbúa, vegna myndunar nýs meirihluta í Kópavogi.

Ég undirrituð er í algjörri andstöðu við þennan meirihluta sem búið er að mynda hér í Kópavogi. Í þeim meirihluta er Y-Listi Kópavogsbúa sem ég átti frumkvæði að því að stofna og fékk gott fólk með mér til að hægt væri að bjóða fram. Grundvallaratriði var að reyna að vinna eins vel og við gætum fyrir Kópavogsbúa. Í framhaldi af því voru sett grunngildi sem við öll ætluðum að starfa útfrá. Þar vó þyngst siðbót í stjórnsýslu og að bæjarstjórinn yrði ópóilitískur - faglega ráðinn . Nú hefur það gerst að Y-Listinn hefur tekið stóra U beygju frá sínum grunngildum að því að virðist, undir forystu sjálfstæðismanna með Ármann Kr. Ólafsson oddvita sjálfstæðisflokksins og hans stuðningsmanna. Ég hef reynt að berjast á móti þessu innan Y- Listans með kjafti og klóm og lenti í minnihluta. Stærsti fjórflokkurinn sem virðist hafa náð yfirhöndinni, þar á meðal vegna afskipta forystunnar á landsvísu ætti að skammast sín og vona ég að kjósendur muni eftir því í næstu kosningum. Hér hafa átt sér pólitísk hrossakaup og fylgir spillingin yfirleitt á eftir með tilheyrandi kostnaði fyrir bæjarfélagið.

Ykkur Kópavogsbúa sem kusu okkur vegna okkar grunngilda vil ég biðja innilegrar afsökunar sem og aðra Kópavogsbúa sem héldu að loforð stæðu hjá stjórnmálaafli. Ég er verulega leið yfir þessu og mun segja mig af Y-Listanum

Þetta er sorglegt!

Ásdís Ólafsdóttir.