Ungir fíkniefnaneytendur leggja undir sig tóm hús

Fíkniefnaneytendur leggja undir sig fjölda tómra húsa á höfuðborgarsvæðinu til að stunda neyslu sína. Faðir fjórtán ára drengs sem dvalist hefur ásamt félögum sínum í tómu iðnaðarhúsi í Borgartúni segist í áfalli eftir að hafa uppgötvað hvað sonurinn hafði fyrir stafni.

Það var faðir eins drengjanna sem dvalið hafa í húsinu sem tók myndirnar sem fylgja þessari frétt. Hann segir það hafa verið mikið áfall að komast að því að sonurinn hafði ekki gist heima hjá vinum sínum eins og hann hafði fullyrt heldur þarna. Maðurinn vildi ekki koma fram undir nafni þar sem hann óttast menn úr fíkniefnaheiminum.

„Þar seinustu helgi hringir lögreglan, sonur minn og félagar hans höfðu verið teknir fyrir að ræna í 10-11 og við hugsuðum ekki um þetta, ég fer bara og sæki hann. Lögreglan talar um eitthvað bakhús í Borgartúninu. Daginn eftir dettur okkur síðan í hug að renna hérna við."

Hann fór inn og leitaði að dóti frá syni sínum sem hann hafði tekið með til að getað gist hjá vini sínu.

„Hérna fann ég sængina hans og ýmsa muni frá honum. Mér var mjög hverft við þegar ég kom þangað inn. Þarna er aðstaða fyrir hjólabretti og þegar ég fór á efri hæðina sá ég aðstöðu til fíkniefnanotkunar og áfengisneyslu. Þetta eru bara fjórtán ára strákar ."

Fréttastofa hafði samband við eiganda húsnæðisins sem sagðist ekki hafa heyrt af þessu en aðeins er um mánuður frá því hann keypti. Til stendur að byggja þar íbúðarhúsnæði.

Faðirinn sem við ræddum við segist hafa vitneskju um að þrettán ára stúlkur hafi sótt þennan stað og þar hafi verið haldnar miklar svallveislur. Hann vill að komið verði í veg fyrir að börn komist þangað inn.

„Þannig það eru niður í þrettán ára krakkar sem hafa verið hérna í einhverju reifi. Það hlýtur að þurfa að loka þessu, þetta er bara skandall."