Erlendur ferðamaður stal bíl fyrir utan Leifsstöð og ók í næsta skafl

Erlendur ferðamaður um tvítugt tók bíl sem var í gangi hjá flugstöð Leifs Eiríkssonar ófrjálsri hendi um þrjúleytið í nótt og keyrði hann í nokkurn tíma undir áhrifum áfengis.

Ekki vildi betur til en svo að hann endaði í snjóskafli og kom lögregla þar að honum steinsofandi. Hann var handtekinn og færður í fangageymslur þar sem hann sefur nú úr sér áfengisvímuna. Minniháttar skemmdir urðu á bílnum en ökumaðurinn slapp ómeiddur.

Svo virðist sem ungi maðurinn hafi verið að skemmta sér í Reykjanesbæ en orðið viðskila við vini sína og ákveðið að taka leigubíl að flugstöðinni. Hann borgaði ekki fargjaldið og þurfti leigubílstjórinn því að gera sér ferð upp á lögreglustöð þar sem málið var tilkynnt.

Þá var ökumaður stöðvaður undir áhrifum ávana- og fíkniefna í Reykjanesbæ og lögreglumenn þar í bæ voru kallaðir út að unglingasamkvæmi vegna hávaða en því máli lauk farsællega eftir að rætt var við húsráðendur.

Lögreglan á Akureyri stöðvaði ungan ökumann fyrir utan lögreglustöðina um sexleytið í morgun og er hann grunaður um akstur undir áhrifum áfengis.