Samaras boðar betri tíð í lok næsta árs

Ríkisstjórnin á Grikklandi reynir nú að semja við fulltrúa Evrópusambandsins og Alþjóðagjaldeyrissjóðsins um næstu útborganir úr neyðarsjóðum þeirra.

Fulltrúar þeirra komu til Grikklands í gær til að leggja lokamat á það hve grískum stjórnvöldum hefur tekist vel að standa við sparnaðaráform, sem voru skilyrði frekari fjárhagsaðstoðar.

Grikkir eru í kappi við tímann, því takist ekki samningar í september hefur ríkissjóður Grikklands ekki bolmagn til að greiða afborganir af öllum lánum.

Antonis Samaras forsætisráðherra lofar því að innan hálfs annars árs muni birta til og hagvöxtur hefjast á ný eftir langt samdráttarskeið. Þetta segir hann þrátt fyrir að sjö prósenta samdrætti sé spáð í ár.

Samaras fór hörðum orðum á þingi í gær um stjórnmálamenn Evrópuríkja, sem hann sagði gera allt sem þeir gætu til þess að gera Grikkjum erfitt fyrir.

Beindi hann þar spjótum sínum ekki síst að Philipp Rösler, sem er viðskiptaráðherra og aðstoðarkanslari Þýskalands. Rösler sagði fyrr í vikunni að tilhugsunin um brotthvarf Grikklands af evrusvæðinu væri ekki jafn skelfileg og áður. Staða Grikklands væri orðin það erfið að annar möguleiki væri varla lengur fyrir hendi.

Rösler hefur reyndar verið harðlega gagnrýndur í Þýskalandi, einkum af stjórnarandstöðunni en einnig af stjórnarliðum.

Með ummælum sínum er Rösler sagður stofna fjárhag Þýskalands í hættu og lækkun lánshæfismats Moodys á mánudag rakin beint til þessara ummæla.

Engan veginn er heldur séð fyrir endann á fjárhagsvandræðum Spánar og Ítalíu og verður samdráttur þar meiri en vonir höfðu staðið til.

Katalónía er til dæmis þriðja sjálfstjórnarhéraðið á Spáni sem biður um fjárhagsaðstoð frá ríkinu. Erfiðleikar héraðanna bætast beint ofan á fjárhagserfiðleika spænskra banka, sem einnig hafa leitað á náðir ríkisstjórnarinnar.

Áhyggjur fjárfesta og evrópskra banka af stöðu Spánar hafa orðið til þess að lántökukostnaður Spánar hefur hækkað verulega síðustu daga, þrátt fyrir að evruríkin hafi síðastliðinn föstudag endanlega gefið samþykki fyrir því að veita Spáni 100 milljarða evra í fjárhagsaðstoð, sem á að renna til verst stöddu banka landsins.

gudsteinn@frettabladid.is