Stóra stundin að renna upp

Frambjóðendurnir í bandarísku forsetakosningunum gerðu víðreist í gær, á lokadegi formlegrar kosningabaráttu þeirra. Skoðanakannanir benda til þess að Obama forseti hafi naumt forskot á Romney.

Mitt Romney fór til Flórída í gær, en skoðanakannanir benda til þess að hann hafi naumt forskot þar. Svo fór hann til Virginíu, New Hampshire og Ohio. Obama fór aftur á móti til Iowa, Wisconsin og Ohiio og með honum í för voru söngvararnir Bruce Springsteen og Jay-Z. Kosningabaráttu hans lauk síðan í Des Moine í Iowa en þar hóf hann kosningabaráttu sína árið 2007 þegar hann bauð sig fyrst fram til forseta. Hann sagði að íbúar Iowa ættu mikinn þátt í því að hann hefði verið kjörinn forseti.

Til stóð að Romney myndi enda kosningabaráttuna í New Hampshire seint í gærkvöldi en öllum að óvörum upplýsti hann í heimsókn sinni þar að hann myndi fara til Ohio og Pennsylvaníu núna í bítið og því berjast fyrir fylginu fram á síðustu stundu.

Skoðanakannanir á landsvísu sýna að þeir Obama og Romney eru hnífjafnir. En kannanir í níu af lykilríkjunum sýna að Obama er með örlítið forskot þar. Niðurstöður í Ohio eru sagðar vera mikilvægastar fyrir frambjóðendurna.