Fjórtán ára stúlka ók bíl á ofsahraða á flótta frá lögreglunni

Lögreglumenn segja það mikla mildi að fjórtán ára stúlka skildi ekki slasast alvarlega eða valda öðrum í umferðinni fjörtjóni, þegar hún ók bíl á ofsa hraða á vegrið á milli akbrauta á Sæbraut, reif það niður á nokkrum kafla uns bíllinn stöðvaðist á ljósastaur.

Lögreglunni var tilkynnt laust fyrir miðnætti, um að stúlkan væri á tilteknum bíl og var óttast um hana. Lögreglumenn á eftirlitsför sáu til bílsins á Breiðholtsbraut skömmu síðar og gáfu stöðvunarmerki, sem stúlkan sinnti ekki.

Síðan ók hún Reykjanesbraut til Norðurs og þaðan inn á Sæbraut, en á móts við Holtagarða missti hún stjórn á bílnum með fyrrgreindum afleiðingum og er bíllinn gjör ónýtur. Hún var flutt með sjúkrabíl á Slysadeild, þar sem í ljós kom að hún var lítið sem ekkert meidd.

Að lokinni aðhlynningu var hún flutt á viðeigandi stofnun og barnaverndaryfirvöldum gert viðvart um málið.