Góð þátttaka í Mottumars

"Það hafa sautján hundruð einstaklingar skráð sig til keppni og tvö hundruð lið. Þetta er alvöru meistaradeild,“ segir Ragnheiður Haraldsdóttir, forseti Krabbameinsfélags Íslands. Góð þátttaka er hjá karlmönnum í landinu í átakinu Mottumars.

Ragnheiður segir að stefnt sé á að safna 35 milljónum í mánuðinum en nú þegar er búið að safna 7,4 milljónum á heimasíðu átaksins. „Svo eru ýmis fyrirtæki og einstaklingar búnir að leggja okkur lið," segir hún. Sú nýbreytni verður í ár að féinu sem safnast í mánuðinum verður ekki varið í kaup á tækjum eða byggingu á húsnæði. „Við ætlum að verja þessu í fræðslu og forvarnir og ráðgjöf og rannsóknir."

Á hverju ári greinast um 220 karlmenn með blöðruhálskrabbamein en það er langalgengasta krabbameinið. Þá eru lungna og ristilkrabbamein líka algeng en Ragnheiður segir að nú sé hægt að greina krabbamein í ristli áður en einkenni koma í ljós. „Það er annars vegar hægt að mæla blóð í hægðum og hinsvegar er hægt að gera ristilspeglun. Það er mikilvægt að menn séu vakandi yfir öllum einkennum og ræði við sinn heilsugæslulækni."

Hægt er að hlusta á viðtal við Ragnheiði í þættinum Reykjavík síðdegis í dag í meðfylgjandi hljóðbroti.