Góð reynsla af að líta ekki á fíkniefnaneyslu sem afbrot

Reynsla Portúgala af því að hætta að líta á fíkniefnaneyslu sem afbrot er góð og hefur engar skaðlegar hliðar í för með sér. Fyrir tveimur dögum birtu Sameinuðu Þjóðirnar skýrslu um að fíkniefnastríðið væri tapað og hefði meiri skaðlegar afleiðingar en góðar. Reynsla Portúgala gæti verið vatn á myllu þessa málstaðar.

Árið 2001 ákváðu stjórnvöld í Portúgal að hætta að líta á neyslu fíkniefna sem afbrot, heróín og kókaín þar með talin. Í umfjöllun The Economist er fjallað um hvernig erlendir fréttamiðlar básúnuðu stanslausar bölsýnisspár í kjölfarið. Svo leið tíminn og þetta róttæka skref Portúgala gleymdist. Þar til ný rannsókn birtist á þessu ári, gerð af lögmanninum Glenn Greenwald.

Greenwald kemst að þeirri niðurstöðu að sú ákvörðun að hætta að líta á eiturlyfjaneyslu sem afbrot hafi ekki aukið notkun þeirra að neinu marki og nú sé fíkniefnaneysla með því lægsta sem gerist í gervöllu Evrópusambandinu í Portúgal.

Reynslan sýnir að alnæmissmit hafa minnkað mjög eftir að skrefið var tekið og sömuleiðis hefur stefnan ekki laðað fíkniefnaneytendur erlendis frá til landsins, eins og upphaflega var talið myndi gerast.

Sú leið sem Portúgalir völdu felur ekki í sér að fíkniefnaneysla sé lögleg. Fólk sem er gripið með eiturlyf er enn stöðvað af lögreglunni og eiturlyfin gerð upptæk. Fólk á hins vegar ekki yfir höfði sér málsókn vegna þessa. Þetta er talið hvetja eiturlyfjafíkla til að leita sér hjálpar í stað þess að sama fólk haldi sig í myrkustu afkimum samfélagsins og forðist að láta sjá sig.

Greenwald birti merkilegar tölur í rannsókn sinni. Fíkniefnafíklar sem leita sér meðferðar voru 24.000 árið 2008. Þeir voru aðeins 6.000 árið 1999 þegar fíkniefnaneysla var enn talin afbrot. Frá árinu 2000 hefur neysla á öllum fíkniefnum dregist saman nema á heróíni, en þar jókst hlutfallið um 0,1%.