Aðeins fyrirliðar fá að ræða við dómarann | ný regla í Noregi

Norska knattspyrnusambandið, NFF, hefur gefið það út að leikmönnum verði óheimilt að ræða við dómara á meðan leikur stendur yfir. Hugmyndin er sú að aðeins fyrirliðar eigi rétt á því að tjá sig við dómarana á meðan leik stendur, aðrir leikmenn verða að halda sig á mottunni.

Þeir sem geta ekki haldið aftur af sér munu fá gult spjald í refsingu og í sumum tilvikum rautt spjald.

NFF hefur undirritað samkomulag við stofnun sem kennd er við friðarverðlaun Nóbels, og er mikil alvara á bak við verkefnið.

Á vefsíðu NFF er sagt frá því að reglan sé hluti samstarfsverkefni sem kallast „handaband til friðar". Markmiðið sé að koma friðarskilaboðum áleiðis í samfélagsumræðuna og íþróttaviðburðir á borð við fótboltaleiki skipa þar stórt hlutverk.

Norðmenn hafa ákveðið að útfæra „handaband til friðar" með þessum hætti:

Í upphafi hvers leiks á vegum NFF munu fyrirliðarnir heilsast „formlega" þar sem að sjónvarpsupptökuvélar munu taka upp hljóð og mynd af þeim atburði.

Að leik loknum verður sami háttur hafður á, fyrirliðarnir munu þakka mótherjunum og dómurum fyrir leikinn í „beinni" sjónvarpsútsendingu.

Ekki kemur fram í tilkynningu NFF hvenær þessar nýju áherslur verða teknar upp. Búast má við því að margir leikmenn í norska fótboltanum eigi eftir að lenda í miklum vandræðum með að aðlagast þessum breyttu áherslum.