Mikið mannfall í Sýrlandi

Mikið mannfall var í gær þegar 190 manns voru drepnir á einum mannskæðasta degi uppreisnarinnar í Sýrlandi.

Aðgerðarsinnar segja að meira en 50 þeirra sem dóu í gær hafi verið í borginni Douma sem er 15 km frá höfuðborginni Damascus.

Bardagar hafa geysað í Douma vikum saman. Aðgerðarsinnar segja að sprengjum hafi ringt yfir borgina dögum saman og átök uppreisnarmanna og yfirvalda verið gífurleg.

Uppreisnin í Sýrlandi hefur orðið blóðugri á undarförnum vikum. Uppreisnarmenn sem hafa augljóslega fengið aðgang að kraftmeiri vopnum hafa valdið meiri dauða meðal hermanna Assad.

Aðgerðarsinnar hafa sakað alþjóðasamfélagið um aðgerðaleysi. Klofningur ríkir á milli vestrænna yfirvalda, sem vilja styðja uppreisnina og Rússlands sem hefur notað neitunarvald sitt í öryggisráði Sameinuðu þjóðanna til að hindra vestræn öfl og Súnní- araba að hrekja Assad frá völdum.