Marklínuboltinn þykir of þungur

Marklínutæknibúnaður er í fyrsta sinn í sögunni notaður í keppni á vegum FIFA á heimsmeistaramóti félagsliða sem fram fer í Japan. Það eru skiptar skoðanir um þetta skref sem FIFA hefur ákveðið að taka og nú hefur leikmaður og knattspyrnustjóri Chelsea gefið nýja boltanum falleinkunn.

Svokallaður GoalRef útbúnaður er notaður í leikjunum á HM félagsliða þar sem að kopaþræðir eru í keppnisboltanum og sérstakur útbúnaður við marklínuna nemur hvar boltinn er staðsettur.

Rafael Benítez, knattspyrnustjóri Chelsea, sagði við fréttamenn í Japan að boltinn væri of þungur. „Hann er of harður og þungur en þetta er ekkert vandamál. Þetta er eins fyrir bæði liðin. Það er venjan að lið fái bolta sem nota á í keppni sem þau geta notað á æfingum og vanist þeim. Það var ekki hægt í þessu tilviki og það gæti verið vandamál sem þarf að leysa," sagði Benítez.

Gary Cahill varnarmaður Chelsea tjáði sig einnig um boltann. „Mér fannst boltinn vera þungur. Kannski var búið að setja of mikið loft í þá, en á heildina litið voru þeir í lagi. Við höfum notað þá á æfingum undanfarna daga og við erum farnir að venjast þeim ágætlega," sagði Cahill en hann er sáttur við að FIFA hafi tekið skrefið með marklínutæknibúnaði. Og sömu sögu er að segja af Benítez, en hann styður aðgerðir FIFA.