Dauðahafið er við dauðans dyr

Dauðahafið mun brátt bera nafn með rentu. Yfirborð hafsins lækkar um rúmlega metra á hverju ári. Höfuðástæðan er sögð vera að vatni úr ánni Jórdan hefur verið veitt annað, en áin er ein aðalaðrennslisæð hafsins.

Allt í kringum Dauðahafið hafa nú myndast sprungur í jarðveginn og hafa tré, girðingar og jafnvel hlutar af gatnakerfinu horfið ofan í þær.

Hugmyndir hafa verið uppi um að leiða vatn úr Rauðahafinu í Dauðahafið til að bjarga því. Sú leið er umdeild, enda dýr og myndi leiða til enn frekara jarðrasks. - ktg