Fjölskylduharmleikur í Bretlandi: Myrti börnin sín og svipti sig lífi

Talið er að faðir þriggja barna hafi stungið þau til bana áður en hann svipti sig lífi skammt frá heimili þeirra í Gloucestershire í Bretlandi fyrir helgi.

Málið hefur vakið mikinn óhug í landinu en lýst var eftir manninum á föstudaginn eftir að eiginkona hans tilkynnti um að hann hafi numið börnin á brott frá heimili þeirra sama dag. Breskir fjölmiðlar segja að daginn áður hafði eiginkonan skrifað á Facebook-síðu sína að hún glímdi við "gráa fiðringinn" og hafi gert "nokkra heimskulega hluti".

Eftir umfangsmikla leit á svæðinu í grennd við bæinn þeirra, Milkwall, fannst fjölskyldubíllinn í skógi rúmlega 100 kílómetrum frá heimili þeirra. Lögreglumenn fundu svo lík barnanna í gær. Þau voru tólf ára, átta ára og sex ára. Skammt frá fannst lík föðurins en svo virðist sem hann hafi kastað sér fram af kletti. Fullyrt er í breskum fjölmiðlum að börnin hafi verið stungin til bana.

Á blaðamannafundi sem lögreglan hélt í gærkvöldi kom fram að málið sé rannsakað sem morðmál og á þessu stigi er faðirinn sá eini sem er grunaður um að hafa myrt börnin. Lík barnanna verða krufin í dag og á morgun.

Faðirinn var þrjátíu og fimm ára gamall og hafði starfað í pappírsverksmiðju um nokkurra áraskeið.

Umfjöllun Daily Mail um málið.