Dómari benti á möguleikann á handtöku fjórmenninganna

Dómari í Al Thani málinu svokallaða gerði athugasemd við það að enginn sakborninga hafi mætt fyrir dóminn þegar málið var þingfest klukkan tvö í dag. Framhald á þinghaldi hefur verið boðað 29. mars, meðal annars vegna þessa.

Ákæran í málinu beinist gegn fyrrverandi stjórnendum Kaupþings, þeim Hreiðari Má Sigurðssyni, Sigurði Einarssyni og Magnúsi Guðmundssyni auk Ólafs Ólafssonar. Um er ræða ákærur í hinu svokallað Al Thani máli en fjórmenningarnir eru meðal annars ákærðir fyrir markaðsmisnotkun og umboðssvik.

Pétur Guðgeirsson héraðsdómari gerði Birni Þorvaldssyni saksóknara grein fyrir þeim möguleika að láta handtaka sakborningana og færa fyrir dóm. „Ég tel eðlilegt að gæta meðalhófs í því," sagði Björn þá.

Dómari gerði líka athugasemd við að ákæruvaldið hefði ekki látið verjendum sakborninga í té hljóð- og myndupptökur af yfirheyrslum sem liggja til grundvallar í málinu. Hann beindi þeim tilmælum til saksóknara að það yrði gert. Ragnar Hall einn af verjendum sakborninga gerði líka athugasemd við þetta.

Björn saksóknari sagði að sakborningum og verjendum þeirra hefði verið boðið að kynna sér skoða upptökurnar í húsnæði sérstaks saksóknara. Ástæða þess að upptökurnar voru ekki afhentar sakborningum var sú að saksóknari hafði áhyggur af því að þær myndu leka út.

Björn Þorvaldsson kærði þau tilmæli dómara að ákæruvaldinu bæri að láta af hendi upptökurnar. Héraðsdómur Reykjavíkur mun úrskurða þann 29. mars næstkomandi um það hvort ákæruvaldinu beri að láta þær af hendi. Þann dag munu sakborningar líka þurfa að mæta fyrir dóminn, eins og fyrr segir.

Athygli vekur að dómurinn í málinu er ekki fjölskipaður.