Hrekja fólk af heimilum

Þann 3. mars árið 2010 varð sjötug kona, Wang Cuiyan að nafni, undir skurðgröfu þegar nokkrir tugir verkamanna unnu að því að rífa niður hús hennar í borginni Wuhan í Hubei-héraði í Kína. Í rauninni var hún grafin lifandi.

Í nýrri 85 blaðsíðna langri skýrslu frá mannréttindasamtökunum Amnesty International eru tilgreind dæmi um níu manns sem létu lífið þegar reynt var að flytja þá nauðuga burt af heimilum sínum.

Þar kemur fram að á síðustu árum hafi milljónir manna verið hraktar burt af heimilum sínum í Kína vegna þess að rífa þurfti heilu hverfin til að rýma fyrir nýframkvæmdum.

„Þrátt fyrir að alþjóðasamfélagið hafi fylgst með og fordæmt slík mannréttindabrot í tengslum við undirbúninginn fyrir Ólympíuleikana árið 2008, þá hefur nauðungarflutningum fjölgað á síðustu þremur árum,“ segir í skýrslunni. Kafað er ofan í fjörutíu dæmi um nauðungarflutninga fólks af heimilum sínum á árunum 2009 til 2011. Alls staðar kom til átaka í tengslum við mótmæli íbúa gegn flutningnum.

Þá er tilgreint 41 dæmi um að fólk hafi kveikt í sjálfu sér til að mótmæla nauðungarflutningum.

Oftast eru það yfirvöld í sveitarfélögum sem ganga svona hart fram gegn fólki. Fyrst er reynt að hrekja fólk burt af heimilunum með stöðugu áreiti, fangavist og barsmíðum.

Ástæðan fyrir hörkunni sem íbúunum er sýnd virðist vera sú að sveitarfélögin hafa stofnað sér í skuldir og reyna síðan að ná niður skuldunum með því að eigna sér land, sem síðan er selt eða leigt verktökum undir nýbyggingar.

Kínastjórn hefur óspart ýtt undir þetta framferði sveitarfélaganna með því að verðlauna og styðja til dáða sveitarstjórnarmenn sem geta sýnt fram á efnahagslegan ávinning í reikningum sveitarfélaganna, alveg án tillits til þess hvaða meðulum er beitt til að bæta efnahagsstöðuna.

Í skýrslunni kemur fram að Wen Jiabao forsætisráðherra og fleiri kínverskir ráðamenn hafi áttað sig á því að þetta er alvarlegt vandamál. Aðrir ráðamenn hafi hins vegar reynt að gera lítið úr vandanum og jafnvel sagt mannréttindabrotin nauðsynlegan fórnarkostnað í þágu framfara landsins.