Cannavaro líklegur til að taka við ítalska landsliðinu

Fabio Cannavaro er sagður vera líklegastur eins og staðan er í dag til að taka við af Cesare Prandelli sem þjálfari ítalska landsliðsins eftir HM 2014. Cannavaro, sem var fyrirliði ítala þegar þeir sigruðu á HM 2006, hefur mikinn áhuga á þjálfun og fær full þjálfararéttindi í júní á næsta ári.

Samkvæmt ítalska fjölmiðlinum Tuttosport, telur ítalska knattspyrnusambandið að Cannavaro sé besti kosturinn. Cannavaro verður með í ítalska þjálfarateyminu sem fer í Álfukeppnina næsta sumar en hann hefur enga þjálfarareynslu að baki.

Fabio Cannavaro er 39 ára og lék á sínum tíma meðal annars með Napoli, Juventus og Real Madrid en hann á að baki 136 A-landsleiki fyrir Ítali. Hann tók þátt í fjórum HM mótum, tveimur úrslitakeppnum EM og einni Álfukeppni.