Júlíus Vífill: Yfirþyrmandi byggingamagn við Landspítalann

Borgarfulltrúar Sjálfstæðisflokksins mótmæla fjórföldun núverandi byggingamagns við Landspítalann við Hringbraut. Þetta er meðal þess sem kom fram í bókun borgarfulltrúans Júlíus Vífils Ingvarsson sem situr í skipulagsráði en hann telur áætlað byggingarmagn á svæðinu yfirþyrmandi.

Samkvæmt samningnum sem nú er lagður fram um framtíðaruppbyggingu Landspítala er gert ráð fyrir a.m.k. 293.000 fermetra byggingarmagni á lóðinni.

Ríkið hefur með samningnum afsalað sér landi sem ekki mun nýtast starfsemi Landspítalans í framtíðinni en fær mjög aukið byggingarmagn á móti á þeim lóðum sem nær standa núverandi spítalastarfsemi.

Með tilliti til þess að samningurinn fjallar um meiri uppbyggingu en nokkur fordæmi eru fyrir hér á landi þarf, áður en hann er samþykktur, að liggja fyrir mat á uppbyggingarþoli svæðisins, áhrif umferðar á umhverfi og nærliggjandi byggð, yfirbragði fyrirhugaðra bygginga og ásýnd þeirra að mati borgarfulltrúans.