Vill reisa álver á Húsavík á tveimur árum

Svissneska álfyrirtækið Klesch vill reisa meðalstórt álver með hraði við Húsavík og hefur formlega óskað eftir því við stjórnvöld að fá að taka yfir álversverkefni Alcoa. Klesch segist geta hafið rekstur innan tveggja ára frá undirritun samninga.

Einkaþotur sem sjást af og til á Akureyrarflugvelli þessi misserin eru ein birtingarmynd þess áhuga sem alþjóðleg stórfyrirtæki sýna nú orkunni í Þingeyjarsýslum. Um miðjan febrúar greindi Stöð 2 frá manninum sem kom á þessari þotu, Mister Bigg, eins og hann heyrðist kallaður þegar einkennistafirnir sáust á þotunni.

Hann heitir í raun Gary Klesch og er aðaleigandi svissnesks fyrirtækis sem rekur þrjú álver, tvö í Hollandi og eitt í Þýskalandi. Í Íslandsheimsókn sinni fyrir þremur vikum fundaði Klesch meðal annars með ráðamönnum Landsvirkjunar og ráðherrum og hefur hann nú sent stjórnvöldum ósk um að hefja formlegar samningaviðræður.

Samkvæmt heimildum fréttastofunnar lýtur beiðni Klesch að því að taka yfir Alcoa-verkefnið á Bakka. Hann vill reisa meðalstórt álver, kaupa 200 megavött raforku, segir Alcoa-verkefnið hafa miðað við allt að 600 megavött, og segist geta hafið rekstur innan 24 mánaða frá því skrifað sé undir samninga.

Forsenda svo hraðrar uppbyggingar er að hann gangi inn í umhverfismat sem búið var að vinna vegna álvers Alcoa á Bakka. Það myndi um leið veita honum forskot fram yfir kísilverin, sem verið er að undirbúa, en matsferli þeirra er nýhafið. Ósk Klesch gæti þannig falið í sér fljótvirkustu leiðina til að hefja atvinnuuppbyggingu í Þingeyjarsýslum.

Hörður Arnarson, forstjóri Landsvirkjunar, kvaðst í dag ekkert vilja tjá sig um viðræðurnar við Klesch en staðfesti þó að Landsvirkjun hefði haft frumkvæði að því að bjóða honum til landsins.