Zlatan með þrennu á 25 mínútum

Sænski framherjinn Zlatan Ibrahimovic skoraði þrennu á 25 mínútum í 4-0 útisigri Paris Saint Germain á Valenciennes í efstu deild frönsku knattspyrnunnar í kvöld.

Zlatan kom gestunum yfir á 28. mínútu og PSG leiddi með einu marki í hálfleik. Zlatan gerði svo út um leikinn snemma í þeim síðari með tveimur mörkum á fjórum mínútum. Argentínumaðurinn Ezequiel Lavezzi bætti við fjórða markinu seint í leiknum og stórsigur gestanna í höfn.

Þetta var fyrsta þrenna Zlatans í búningi PSG en hann gekk til liðs við félagið fyrir yfirstandandi leiktíð. Svíinn hefur einnig skorað þrennu í efstu deild ítölsku knattspynunnar með AC Milan og Juventus.

Zlatan er langmarkahæsti leikmaður deildarinnar með 17 mörk. Næstur kemur Bafetimbi Gomez hjá Lyon með 10 mörk.

Með sigrinum minnkaði Parísarliðið bilið í Lyon á toppi deildarinnar í þrjú stig. Lyon hefur 34 stig, PSG 32 stig og Marseille 29 stig. Zlatan og félagar hafa þó leikið leik meira en önnur lið.