Wambach búin að skora í öllum leikjunum - Bandaríkin í undanúrslitin

Abby Wambach skoraði annað marka bandaríska kvennalandsliðsins í fótbolta þegar liðið vann 2-0 sigur á Nýja-Sjálandi í dag í átta liða úrslitunum á Ólympíuleikunum í London. Bandaríska liðið er því komið í undanúrslitin á fimmtu leikunum í röð þar sem liðið mætir annaðhvort Bretlandi eða Kanada sem spila seinna í kvöld.

Wambach, sem er orðin 32 ára gömul, hefur þar með skorað í öllum fjórum leikjum bandaríska liðsins á leikunum. Hún skoraði markið sitt á 27. mínútu og fagnaði með því að fara í handahlaup. Varamaðurinn Sydney Leroux innsiglaði síðan sigurinn á 87. mínútu leiksins og markvörðurinn Hope Solo hélt hreinu í þriðja leiknum í röð.

Abby Wambach bætti markamet bandarísk leikmanns á Ólympíuleikum en hún er nú búin að skora átta mörk á ÓL þrátt fyrir að missa af leikunum 2008 vegna fótbrots. Wambach vantar ennfremur "bara" 16 mörk til að jafna heimsmet Miu Hamm sem skoraði á sínum tíma 158 mörk fyirr bandaríska landsliðið.