Zlatan: Ég hef oft skoðað markið mitt á Youtube

Zlatan Ibrahimovic hefur verið frábær á árinu 2012 og markið hans stórkostlega á móti enska landsliðinu á dögunum er í efsta sæti á flestum listum yfir flottusta mörk ársins.

Ibrahimovic skoraði þá með hjólhestaspyrnu fyrir utan teig en þetta var fjórða mark hans í leiknum sem Svíar unnu 4-2.

Zlatan Ibrahimovic segist vera einn af þeim fjölmörgu sem hafa skoðað markið á Youtube-síðunni og það oftar en einu sinni.

„Það er skemmtilegast að heyra aðra lýsa markinu. Ég hafði mjög gaman af því þegar ég skoðaði markið og heyrði lýsingar á því á arabísku, hjá Stan Collymore í Englandi eða hjá strákunum á Kanal 5 í Svíþjóð," sagði Zlatan Ibrahimovic.

„Ég fæ gæsahús og fyllist af adrenalíni þegar þeir eru að lýsa markinu mínu. Ég hef því freistast til að horfa nokkrum sinnum á það til viðbótar," sagði Ibrahimovic.

„Þetta er mitt besta ár en á hverju ári finnst mér ég alltaf verða betri og betri. Ég átti frábært ár þrátt fyrir að hafa ekki unnið neitt með AC Milan," sagði Zlatan Ibrahimovic en hann skoraði 28 mörk fyrir AC Milan og varð markahæsti leikmaður ítölsku deildarinnar. AC Milan missti hinsvegar af titlinum en Zlatan var búinn að vera meistari með sínu liði samfellt frá árinu 2004.