Stuðningsmenn vilja fá að standa á leikjum í enska boltanum

Samtök stuðningsmanna liða í ensku úrvalsdeildinni hafa lagt fram formlega ósk þess efnis að gerð verði tilraun á nokkrum völlum hjá liðum að bjóða upp á svæði þar sem að áhorfendur geta staðið á meðan þeir fylgjast með leiknum. Slíkt hefur lengi tíðkast hjá liðum á borð við Borussia Dortmund í Þýskalandi en öll slík svæði voru tekin úr umferð á Englandi eftir að 96 stuðningsmenn Liverpool létust árið 1989 á Hillsboroug.

Það þarf samþykki lögregluyfirvalda til þess að þessi tilraun fái fram að ganga. En fyrst þarf að sannfæra yfirvöld um að slík áhorfendaaðstaða sé örugg og skapi ekki hættu.

Árið 1990 voru sett lög á Englandi þar sem að stæði fyrir áhorfendur á leikjum í tveimur efstu knattspyrnudeildunum voru bönnuð. Og aðeins sæti hafa verið í boði frá þeim tíma.

Samtök stuðningsmanna benda á að frá árinu 1990 hafi ýmislegt breyst hvað varðar hegðun áhorfenda á leikjum og gera samtökin sér vonir um að nokkur félög fái að prófa að bjóða upp á slíka aðstöðu. Aston Villa, Sunderland, West Ham, Swansea og Peterborough hafa lýst yfir áhuga á að fá að taka þátt í slíku verkefni.

Englendingar hafa skoðað gaumgæfilega hve vel hefur tekist til hjá þýskum liðum varðandi fjölbreytta áhorfendaaðstöðu og mismunandi miðaverð.

Þar fer Borussia Dortmund fremst í flokki en um 25.000 miðar í stæði eru í boði á Westfalenstadion á heimaleikjum liðsins. Stuðningsmenn liðsins kunna vel að meta lágt miðaverð sem þar er í boði og gríðarleg stemning er á heimaleikjum Dortmund – og þá sérstaklega á þessu svæði.