Chelsea mætir Corinthians komist liðið í úrslitaleikinn

Brasilíska félagið Corinthians tryggði sér í dag sæti í úrslitaleiknum á Heimsmeistarakeppni félagsliða eftir 1-0 sigur á Al Ahly frá Egyptalandi en þarna mættust Suður-Ameríkumeistararnir og Afríkumeistararnir í fyrri undanúrslitaleik keppninnar.

Paolo Guerrero skoraði eina mark leiksins á 30. mínútu eftir að hafa skallað inn fyrirgjöf frá Douglas án þess að markvörður Al Ahly , Sherif Ekramy, kæmi vörnum við.

Evrópumeistarar Chelsea spila sinn undanúrslitaleik á morgun á móti Monterrey frá Mexíkó en úrslitaleikurinn fer síðan fram á sunnudaginn. Allir leikir keppninnar fara fram í Japan.

Sanfrecce Hiroshima frá Japan tryggði sér fimmta sætið með 3-2 sigri á Ulsan Hyundai frá Suður-Kóreu í dag. Al-Ahly vann Sanfrecce Hiroshima í sex liða úrslitunum en Monterrey hafði betur á móti kóreska liðinu.