Fyrsti sigurinn í 48 daga hjá Jóhanni Berg og félögum

Jóhann Berg Guðmundsson var í byrjunarliði AZ Alkmaar í kvöld þegar liðið vann 2-1 útisigur á Zwolle í hollensku úrvalsdeildinni í fótbolta. Þetta var langþráður sigur hjá AZ-liðinu sem vann síðasta deildarleik 28. október.

AZ Alkmaar var búið að leiki sex deildarleiki í röð án sigurs og hafði fyrir vikið dottið niður í tólfta sæti deildarinnar. AZ er áfram í 12. sætinu en núna aðeins einu stigi á eftir Heracles Almelo.

Jóhann Berg spilaði fyrstu 86 mínútur leiksins en var tekinn útaf í stöðuni 2-1. Bandaríkjamaðurinn Jozy Altidore skoraði bæði mörk liðsins á fyrstu 34 mínútum leiksins en Denni Avdić minnkaði muninn á 57. mínútu.