Alfreð Finnbogason jafnaði félagsmet hjá Heerenveen

Afreð Finnbogason og félagar í Heerenveen gerðu jafntefli, 4-4, við Roda í hollensku úrvalsdeildinni í knattspyrnu en Íslendingurinn skoraði eitt mark fyrir Heerenveen í leiknum.

Filip Djuricic kom Heerenveen yfir eftir rúmlega 25 mínútna leik Roda náði að jafna metin stuttu síðar. Heerenveen skoraði síðan næstu tvö mörk leiksins og var það Alfreð Finnbogason sem gerði þriðja mark heimamanna. Leikmenn Roda neituðu að gefast upp og minnkuðu muninn á 77. mínútu leiksins.

Alfreð Finnbogason kom síðan við sögu í fjórða marki Heerenveen þegar hann lagði upp mark fyrir Rajiv Van La Parra. Roda náði samt sem áður aftur að minnka muninn tveim mínútum síðar og jöfnuðu síðan metin á 90. mínútu leiksins þegar Guus Hupperts skoraði fjórða mark Roda í leiknum og niðurstaðan jafntefli í miklum markaleik.

Alfreð Finnbogason hefur nú skorað 12 mörk í 14 leikjum fyrir félagið og jafnar þá met Afonso Alves, fyrrum leikmann félagsins, sem þurfti einnig aðeins 14 leiki til að skora 12 mörk fyrir Heerenveen. Alfreð hefur verið magnaður með liðinu á tímabilinu og er greinilega í sínu besta formi.

Heerenveen er í 13. sæti deildarinnar með 15 stig liðinu hefur kannski ekki alveg gengið sem skyldi á tímabilinu en Alfreð hefur verið frábær.