Fjöldi Dana hefur ekki lengur efni á að jarða ættingja sína

Sveita- og bæjarstjórnir í Danmörku þurfa í sívaxandi mæli að standa straum af kostnaði við jarðarfarir þegna sinna. Annaðhvort finnast engir ættingjar eða þá að ættingjarnir segjast einfaldlega ekki hafa efni á jarðarförinni.

Fjallað er um þetta vandamál í Politiken. Þar segir að algengasta ástæðan fyrir því að sveitar- og bæjarfélög þurfi að greiða fyrir jarðarfarir sé sú að ættingjar hins látna segja að þeir hafi alls ekki efni á að jarða viðkomandi.

Í úttekt Politiken kemur fram að á síðasta ári þurftu sveitar- og bæjarfélög að jarða tæplega 1.300 einstaklinga á eigin reikning af fyrrgreindum ástæðum. Slík jarðarför tekur að jafnaði 12 mínútur í kirkju en án þess að prestur haldi líkræðu og á kistunni er aðeins mjög fátæklegur blómakrans.

Það sem af er þessu ári er fjöldi jarðarfara sem fara fram með þessum hætti orðinn jafnmikill og allt árið í fyrra sem þó var metár hvað þetta varðar. Það kostar sveitarfélag rúmlega 10.000 danskar krónur eða um 220.000 krónur að borga fyrir jarðarför.