Íslendingar flæktir í stórt fíkniefnamál - Teygir anga sína til Danmerkur

Lagt var hald á verulegt magn af fíkniefnum við húsleitir í Kaupmannahöfn í Danmörku, en tveir menn hafa verið úrskurðaðir í fjögurra vikna gæsluvarðhald í þágu rannsóknarinnar, sem er unnin í samvinnu við lögregluliðin á höfuðborgarsvæðinu og Suðurnesjum. Á vef dönsku lögreglunnar kemur fram að efnið sem haldlagt var sé hálft kíló af kókaíni, og tæplega 41 þúsund e-pillur. Þá var lagt hald 26 þúsund dollara, sem samsvara yfir þremur milljónum króna.

Mennirnir, Íslendingur á þrítugsaldri og Pólverji á fertugsaldri, búsettur hérlendis, voru handteknir í Kaupmannahöfn í gær, en báðir hafa áður komið við sögu hjá lögreglu. Hér heima var par handtekið og yfirheyrt vegna málsins, en maðurinn var handtekinn við heimkomu frá Kaupmannahöfn. Hann er íslenskur, rétt eins og konan, en bæði eru þau á þrítugsaldri. Maðurinn hefur verið úrskurðaður í vikulangt gæsluvarðhald, eftir því sem fram kemur í tilkynningu frá lögreglunni.

Rannsókn málsins, sem snýr meðal annars að því hvort flytja hafi átt fíkniefnin til Íslands, hefur staðið yfir í nokkurn tíma og framkvæmdar hafa verið fjórar húsleitir hérlendis vegna þessa. Í þeim aðgerðum hefur verið lagt hald á fjármuni, en einnig stera, tæki og tól sem tengjast sölu og dreifingu fíkniefna og vopn. Við fyrrnefndar aðgerðir lögreglu voru notaðir fíkniefnaleitarhundar frá tollinum.

Í tilkynningu frá lögreglunni segir að frekari upplýsingar sé ekki hægt að veita að svo stöddu, en upplýst verði nánar um gang rannsóknarinnar eftir því sem henni vindur fram. Einnig er fjallað um málið á heimasíðu lögreglunnar í Kaupmannahöfn.