Segir Bóas hafa verið kærðan fyrir stórfelld fjársvik

Sigurður K. Kolbeinsson, eða Siggi eins og hann er kallaður í umdeildu myndbandi á Youtube, segir í yfirlýsingu sem hann sendi á fréttastofu að Bóas Ragnar Bóasson athafnamaður, sé ábyrgur fyrir myndbandinu þar sem fram koma alvarlegar ásakanir á hendur framkvæmdastjóra Landsbjargar, Guðmundar Arnar Jóhannssonar, sem hefur vikið tímabundið frá störfum vegna málsins.

Sigurður er framkvæmdastjóri fyrirtækisins Hótelbókanir í Kaupmannahöfn, hotelbokanir.is, en hann hefur einnig staðið fyrir tónleikum íslenskra hljómsveita í Danmörku þar sem hann er búsettur.

Nafn hans ber á góma í fyrrnefndu myndbandi en hann segir í yfirlýsingunni að Bóas sæti lögreglurannsókn vegna kæru fyrir stórfellt skjalafals og meint fjársvik.

Vísir hefur fengið það staðfest að Bóas hafi verið kærður og yfirheyrður vegna umræddra viðskipta. Í DV kemur fram að maðurinn á að hafa fengið 170 milljónir í lán frá mönnunum, meðal annars Guðmundi Erni, en samkvæmt heimildum Vísis rannsakar lögreglan á höfuðborgarsvæðinu málið en ekki sérstakur saksóknari eins og Sigurður virðist halda. Er Bóas grunaður um að hafa stungið undan hundrað milljónum króna.

Guðmundur Örn vill meina að myndbandið sé hefnd vegna kærunnar, og að Bóas hafi birt myndbandið með það að markmiði að fá Guðmund til þess að falla frá kæru. Von er á yfirlýsingu frá Guðmundi vegna málsins, en ekki hefur náðst í Bóas Ragnar þrátt fyrir ítrekaðar tilraunir. Þá hefur Guðmundur ekki útskýrt viðskiptin við Bóas frekar.

Hörður Már Harðarson, formaður Landsbjargar, sagði í viðtali við Vísi i morgun að ekkert óeðlilegt hefði komið í ljós í yfirferð starfsmanna yfir bókhald félagsins. Guðmundur Örn er nú í tímabundnu leyfi og óvíst hvort hann snúi aftur.

Hér fyrir neðan er yfirlýsing Sigurðar:

Sá einstaklingur sem er höfundur þess efnis sem sent var til DV og valins hóps viðtakenda, þ.m.t. stjórnar Slysavarnafélagsins Landsbjargar, og beint var gegn framkvæmdastjóra samtakanna, sætir um þessar mundir lögreglurannsókn vegna kæru fyrir stórfenglegt skjalafals og meint fjársvik.

Maðurinn heitir Bóas Ragnar Bóasson og meint brot hans eru talin varða við hegningarlög þar sem refsing getur varðað langri fangelsisvist. Það er mitt mat að nær hefði verið fyrir DV að kynna sér málið hjá Sérstökum Saksóknara áður en blaðaskrifum var hleypt af stokkunum.