Stærsta hópslysaæfing sem haldin hefur verið

Stærsta hópslysaæfing sem haldin hefur verið hér á landi fór fram í Reykjavík í dag. Yfir sex hundruð manns frá öllum viðbragðsaðilum komu að æfingunni þar sem flugvél með hundrað farþega átti að hafa brotlent á Reykjavíkurflugvelli.

Isavia heldur reglulega flugslysaæfingar á stærstu flugvöllum landsins. Í dag var komið að umfangsmikilli flugslysaæfingu á Reykjavíkurflugvelli og voru sjálfboðaliðar mættir eldsnemma til að láta mála á sig meiðsli og aðra áverka til að gera æfinguna sem raunverulegasta.

Klukkan ellefu hófst síðan æfingin sjálf þegar kveikt var í bílahrúgum sem áttu að vera flak flugvélar Puffin Air sem átti að hafa brotlent á vellinum eftir að eldur hafði komið upp í hreyfli vélarinnar. Slökkviliðsmenn mættu stuttu síðar til að slökkva eldinn og mátti sjá aðra viðbragðsaðila svo sem lögreglu, sjúkraflutningamenn, björgunarsveitir og fleiri flykkjast að innan tíðar.

Þegar búið var að slökkva allan eld fóru menn að athuga með farþega vélarinnar sem voru á víð og dreif um svæðið og huga að fólki sem var enn fast í flaki vélarinnar en meðal annars þurfti að beita klippum til að ná þeim út.

Meðal farþega var kona og níu ára sonur hennar, konan er langt gengin með sitt annað barn og hafði hún fengið högg í kviðinn í slysinu. Verkefni fyrsta hópsins sem kemur til hennar er að skrá og greina ástand hinna slösuðu.

Konan fær rauða merkingu sem þýðir að hún sé í forgangshópi fyrir flutning af svæðinu. Eftir nokkra bið eru hún og sonur hennar flutt í söfnunarstöð slasaðra þar sem öllum er safnað saman og fyrsta hjálp veitt.

Að lokum er konan flytur sjúkrabíll konuna á Landsspítalann í Fossvogi þar sem tekið er á móti henni og ákveðið hvers konar meðferð hún þarf að fá og kallað á kvensjúkdómalækni.

Á sama tíma söfnuðust aðstandendur saman í MH og biðu þar fregna af sínum ástvinum eins og um alvöru slys væri að ræða. Æfingin hefur verið í undirbúningi í um þrjá mánuði en gríðarlegur fjöldi fólks kemur að henni.

„Þetta er trúlega stærsta æfing sem Isavia hefur staðið fyrir, heildarfjöldi þátttakenda er um 630 manns, það er þá bæði þeir sem eru að búa til æfinguna, leikarar og þeir sem skipuleggja sem og þeir sem eru að leysa atburðinn, en það eru 510 einstaklingar sem beint og óbeint koma að því að leysa úr aðgerðum," segir Árni Birgisson, samræmingarstjóri flugvalla Isavia.

Hann segir æfingu sem þessa hafa mikla þýðingu fyrir viðbragðsaðila á svæðinu.

„Flugslys er jú ekki annað en bara hópslys og kannski það slys sem lang minnstar líkur eru á að eigi sér stað en þessi undirbúningur og æfing gagnast eins vel fyrir annað hópslys sem viðbragðsaðilar á höfuðborgarsvæðinu stæðu fyrir.