Glæpagengi upprætt á Jótlandi

Lögreglan á Jótlandi hefur upprætt glæpagengi sem smyglaði hörðum fíkniefnum frá Hollandi og Þýskalandi til Esbjerg og Vejle.

Alls hafa 12 manns verið handteknir í tengslum við rannsókn málsins. Það sem hefur vakið athygli í dönskum fjölmiðlum hvað þetta mál varðar er að nokkrar mjög venjulega ungar stúlkur, sem ekki voru á sakaskrá, störfuðu sem burðardýr fyrir glæpagengið.

Stúlkurnar fengu aðeins tæplega 5.000 danskar krónur, eða um 100.000 kr., fyrir að aka bílum með fíkniefnin yfir dönsku landamærin en í hverjum bíl voru allt að 10 kíló af amfetamíni og kókaíni.