Frönsku stelpurnar í undanúrslitin í fótbolta kvenna - slógu út Svía

Frakkland er komið í undanúrslit á fótboltakeppni kvenna á Ólympíuleikunum eftir 2-1 sigur á Svíþjóð í átta liða úrslitunum. Frakkland mætir annaðhvort Brasilíu eða Japan í undanúrslitunum.

Frönsku stelpurnar hefndu þarna fyrir tap á móti Svíum í bronsleiknum á HM í Þýskalandi fyrir ári síðan en Frakkar hafa aldrei komist í úrslitaleik á stórmóti.

Nilla Fischer, fyrirliði sænska liðsins, kom Svíum í 1-0 með öxlinni eftir hornspyrnu á 18. mínútu en þær frönsku voru búnar að ná forystunni fyrir hálfleik.

Varnarmennirnir Laura Georges og Wendie Renard skoruðu mörkin, Georges með skalla á 29. mínútu og Renard af stuttu færi á 39. mínútu.

Fischer var nálægt því að jafna metin á 72. mínútu en franski markvörðurinn Sarah Bouhaddi varði frábærlega frá henni.

Hinir leikirnir í átta liða úrslitunum fara einnig fram í dag en þar mætast: Bandaríkin-Nýja Sjáland, Brasilía-Japan og Bretland-Kanada.