ÍBV riftir samningi sínum við Eyþór Helga | Tryggvi í ótímabundið agabann

Knattspyrnudeild ÍBV sendi í kvöld frá sér fréttatilkynningu þar sem fram kemur að félagið hafi ákveðið að rifta samningi sínum við Eyþór Helga Birgisson. Þá hefur Tryggvi Guðmundsson verið settur í ótímabundið bann hjá félaginu.

Félagarnir brutu agareglur liðsins um síðustu helgi en þá fór Þjóðhátíð fram í Vestmannaeyjum líkt og allar götur síðan 1874. Magnús Gylfason, þjálfari ÍBV, sagði í viðtali í Pepsi-mörkin í kvöld að félagarnir hefðu brotið áfengisneyslubann um helgina.

Hvorugur leikmannanna var í leikmannahópi Eyjamanna sem vann 2-0 sigur á KR í Pepsi-deild karla í kvöld.

Yfirlýsingin frá ÍBV

Knattspyrnudeild ÍBV hefur ákveðið að rifta samningi við Eyþór Helga Birgisson. Eyþór Helgi braut agareglur liðsins um síðastliðna helgi en þetta er í annað sinn sem hann brýtur agareglur liðsins í sumar. Því var samningnum rift.

Þá hefur Tryggvi Guðmundsson verið settur í ótímabundið agabann hjá félaginu. Tryggvi braut sömuleiðis agareglur liðsins um síðustu helgi.

Knattspyrnuráð harmar framkomu leikmannanna tveggja. Knattspyrnudeild ÍBV harmar framkomu leikmannanna tveggja og þykir miður að þeir hafi komið sér í þessa stöðu.