Dorrit kom villuráfandi hundi til bjargar

Dorrit Mousaieff forsetafrú kom hundinum Sesar til bjargar þegar hún og Ólafur Ragnar voru stödd í Garðabæ á dögunum. Hundurinn slapp einhvern veginn út af heimili í Garðabæ og ráfaði þaðan sem leið lá að Garðatorgi fyrir utan verslun Hagkaupa . Vildi þá svo vel til að forsetafrúin sjálf, frú Dorrit Moussaieff var þar stödd í erindagjörðum og Ólafur Ragnar maður hennar einnig. Hann beið í forsetabílnum.

Samkvæmt frásögn Víkurfrétta varð Dorrit hundsins vör og sér að hann er þarna einn og yfirgefinn, en Sesar er af gerðinni chihuahua. Hún bregður því á það ráð að taka bara hundinn með sér heim á Bessastaði enda enginn eigandi nálægur og honum augljóslega brugðið.

Ellert Magnason eigandi hundsins, er á meðan þessu öllu stendur staddur í Vestmannaeyjum að spila golf. Hann fékk þá símtal á meðan á leik stóð en símanúmer hans er ritað á nafnspjald hundsins. Þegar Ellert svarar símanum bregður honum því að hinu megin á línunni er enginn annar en Ólafur Ragnar Grímsson, forseti Íslands, sem tilkynnir honum að hann sé með hundinn og bíður honum að sækja hann á Bessastaði.

Ingunn Yngvadóttir, eiginkona Ellerts og hinn eigandi Sesars, segir við Víkurfréttir að atburðarrásin hafi verið eins og í lygasögu. Hún er forsetahjónunum þó afskaplega þakklát, því hundurinn hefði getað farið sér að voða.