Sá Tom og Katie: Leiðinlegt að þetta var síðasta máltíðin

Tökur standa enn yfir á myndinni Oblivion við Veiðivötn samkvæmt talsmanni hennar og því má leiða líkum að því að Cruise, sem er aðalleikari myndarinnar, sé enn á landinu.

Skilnaður hans og leikkonunnar Katie Holmes hefur valdið miklu fjaðrafoki en leikarinn hefur enn ekkert viljað tjá sig og hafa erlendir slúðurmiðlar því tekið upp á að lesa í myndir sem íslenskir ljósmyndarar hafa náð af parinu.

Myndir sem ljósmyndari Morgunblaðsins náði af parinu í Þingholtsstræti fyrir tveimur vikum hafa verið mjög eftirsóttar og það er kannski ekki skrýtið því engar myndir hafa verið teknar af leikurunum saman eftir þann tíma svo vitað sé.

Á myndinni má sjá parið leiðast og segja miðlarnir að hún sýni að Cruise hafi ekki haft hugmynd um það sem braust um í kollinum á eiginkonunni. Þá fullyrða þeir að parið hafi sést í síðasta sinn saman á veitingastaðnum Sushi Samba síðar þennan dag og hafa einnig lesið í hegðun þeirra þar inni.

„Ég sá þegar þau komu út og hún labbaði á undan og Tom á eftir og síðan kom einhver barnapía með litlu stúlkuna þeirra. Þau fóru fljótlega upp í bílinn, hann horfði aðeins í kringum sig og svo var ekið í burtu. Leiddust ekki eða horfðu hvort á annað? Nei það var ekkert svoleiðis," segir Eiríkur Steinþórsson.

„Það er nú dálítið einkennilegt að hugsa til baka með það. En því miður, það er leiðinlegt að þetta skuli hafa verið síðasta máltíðin," segir Eiríkur.

Nýjasta myndin af Cruise var svo tekin af íslenskum ljósmyndara en þar má sjá leikarann yfirgefa Reykjavíkurflugvöll en þessi mynd hefur birst víða um heim.

Connor Cruise, sonur leikarans, sem kom hingað til lands fyrir nokkrum dögum hefur verið iðinn við að segja frá Íslandsævintýrum sínum á samskiptasíðunni Twitter en hann hefur þó ekkert nýtt ritað þar frá á föstudag, sama dag og fjölmiðlar greindu frá skilnaðinum.

Hann áætlar að dvelja hér á landi með föður sínum þar til á föstudaginn næsta en Cruise verður fimmtugur á þriðjudag og ljóst að augu pressunnar vestanhafs verða á leikaranum og Íslandi á afmælisdeginum.