Biskupsvígsla hafin í Hallgrímskirkju

Vígsluathöfn hófst klukkan 14 í Hallgrímskirkju. Þar mun herra Karl Sigurbjörnsson, fráfarandi biskup Íslands, vígja Agnesi M. Sigurðardóttur í embætti biskups.

Séra Agnes er fyrsta konan til að gegna embætti biskups Íslands en hún verður fjórtánda manneskjan sem gegnir embættinu frá því að biskupsdæmin tvö, Skálholtsbiskupsdæmi og Hólabiskupsdæmi, voru sameinuð í eitt og biskupsstóllinn fluttur til Reykjavíkur.

Fjölmenni er komið í kirkjuna en þar á meðal eru fulltrúar erlendra kirkja - alls eru ellefu erlendir biskupar viðstaddir athöfnina.

Þrír kórar munu syngja við athöfnina, Mótettukór Hallgrímskirkju, Dómkórinn og kirkjukór Bolungarvíkur. Dómkórinn mun einnig syngja fyrir athöfnina, frá klukkan hálf tvö. Þá mun dóttir Agnesar, Margrét Hannesdóttir, syngja einsöng í athöfninni.