Smuda: Lewandowski á leið til United

Francieszek Smuda, landsliðsþjálfari Póllands í knattspyrnu, segir í viðtali við Reuters-fréttastofuna að skærasta stjarna liðsins, Robert Lewandowski, sé á leið til Manchester United.

Reuters vitnar í ummæli Smuda úr pólska dagblaðinu Dziennik Gazeta Prawna þar sem hann segir þríeyki landsliðsins sem spilar með Borussia Dortmund í Þýskalandi á leið í stærri verkefni.

Leikmennirnir sem um ræðir eru Lukasz Piszczek, Kuba Blaszczykowski auk Lewandowski.

„Lewy er á leið til Manchester United, Kuba fer einnig til Englands og Piszczek til Real Madrid. Þeir hafa sín markmið og vilja gera betur. Ég byggi hópinn minn á þessum leikmönnum," sagði Smuda.

Pólverjar mæta Grikkjum í opnunarleik mótsins á þjóðarleikvanginum í Varsjá í dag klukkan 16.