Uppgjafahermenn mótmæltu stríðsrekstri

Um 50 bandarískir uppgjafahermenn fleygðu heiðursorðum sínum í götuna í Chicago í gær. Mennirnir mótmæltu fyrir utan fundarstað Atlantshafsbandalagsins sem nú kemur saman í borginni.

Mennirnir mótmæltu stríðsrekstri Bandaríkjanna og NATO í Írak og Afganistan en mennirnir höfðu flestir gegnt herþjónustu í löndunum.

Samkvæmt fréttaveitunni Reuters voru mennirnir klæddir einkennisbúningum sínum. Þá felldu margir tár þegar þeir útskýrðu hvers vegna þeir gripu til þessa örþrifaráðs.

„Orðurnar voru veittar fyrir hetjudáðir okkar," sagði Zach LaPorte en hann gegndi herþjónustu í Írak árin 2005 og 2006. „Mér líður ekki eins og hetju. Ég á þær ekki skilið. Ég var vitni að því þegar óbreyttir borgarar voru drepnir, aðrir voru handteknir af hermönnum sem voru í landinu í leyfisleysi."

LaPorte fagnaði því að yfirvöld í Bandaríkjunum hefðu kvatt hermenn sína úr Írak. Hann var þó efins um að NATO ætti eftir að kalla herafla sinn frá Afganistan á næstunni.

Mennirnir höfðu óskað eftir því að fá að afhenda talsmanni NATO orðurnar. Ósk þeirra var hins vegar hafnað.

Þeir ákváðu því að fleygja orðunum í átt að fundarstað Atlantshafsbandalagsins.