Mörgæs á flótta handsömuð í Tókíó

Yfirvöld í Japan hafa loksins handsamað mörgæs sem flúði úr sædýrasafni í Tókíó fyrir tveimur mánuðum síðan. Mörgæsinni tókst að klifra yfir háan vegg og komast í gegnum girðingu sem umlykur safnið og síðan lét hún sig einfaldlega hverfa í mannhafið í stórborginni.

Sést hefur til hennar af og til á sundi í ám sem renna í Tókíó-flóann en engum hefur tekist að hafa hendur í hári hennar, ef svo má að orði komast.

En Adam var ekki lengi í paradís því í gær tókst starfsmönnum safnins að handsama mörgæsina þar sem hún var að spóka sig á árbakka. Mörgæsin knáa minnir um margt á frændur hennar í teiknimyndinni Madagascar, sem voru miklir flóttasérfræðingar.