Hodgson er góður fyrir sóknarþenkjandi leikmenn

Alex Oxlade-Chamberlain, leikmaður Arsenal, lék sinn fyrsta A-landsleik gegn Norðmönnum um helgina og hann er því eðlilega ánægður með nýja þjálfarann, Roy Hodgson.

Uxinn er aðeins 18 ára gamall og hann efast ekki um að sóknarþenkjandi leikmenn eins og hann sjálfur muni græða á því að hafa Hodgson sem þjálfara.

"Hodgson er góður maður og nær vel saman við alla í liðinu. Hann er léttur og fær menn til þess að hlæja og er svo frábær að leggja upp leiki," sagði Oxlade-Chamberlain.

"Hann leyfir okkur sem viljum sækja að vera við sjálfir og það er virkilega jákvætt. Það er mikil stemning í okkar herbúðum og það verður gaman að byrja EM."