Vill taka upp ríkisdal og flatan 20 prósenta skatt

Upptaka ríkisdals og flatur tuttugu prósenta skattur eru meðal stefnumála Hægri Grænna sem kynntu forystu flokksins og stefnu sína á fjölmennum fundi í dag. Formaðurinn segir að núverandi ríkisstjórn muni springa á næstu vikum.

Um hundrað og tuttugu manns voru mættir til að hlusta á stefnumál Hægri Grænna á Múlakaffi í dag en flokkurinn kynnti þá í fyrsta skipti stefnu sína og forystu.

„Hægri grænir standa fyrir lága skatta, sem minnst ríkis afskipti og friðsöm milliríkjaviðskipti og náttúruvernd númer eitt, tvö og þrjú," segir Guðmundur Franklín Jónsson, formaður Hægri grænna.

Guðmundur segir núverandi ríkisstjórn ekki eiga langt eftir og það sé gott svigrúm fyrir flokk eins og hægri græna í stjórnmálum landsins.

„Ég gef þeim fram í lok maí og þau geta aldrei komið með tillögur sem að fólk vill sjá í skuldavandamálum heimilanna og verðtryggðum lánum, svo ef við erum svo heppin að hún springi í lok maí, byrjun júní þá setjum við allt í full swing," segir Guðmundur Franklín.

Um 1100 manns hafa nú þegar skráð sig í flokkinn en meðal stefnumála er að hætta við ESB aðildarviðræður, taka upp ríkisdal sem væri gengisfastur við bandaríkjadollar, tuttugu prósenta flatur skattur og leggja niður tolla og vörugjöld, Guðmundur segir flokkinn hafa lausnir á helstu deilumálum þjóðarinnar.

„Stefnuskráin er reyndar svolítið löng, 75 kaflar með 33 stoðköflum og 40 öðrum skemmtiköflum fyrir fjölmiðla og aðra svo þetta eru rúmlega 1000 blaðsíður og samanlagt er þetta meira en stefnuskrá allra hinna flokkanna til samans," segir Guðmundur Franklín að lokum.