Oxford og Cambridge mættust í undarlegri róðrakeppni

Hin árlega róðrakeppni Oxford- og Cambridge háskólanna í var haldin í 158. skipti í Lundúnum í dag. Keppnin var vægast sagt sérstök þetta árið enda þurfti að endurræsa liðin eftir að grunlaus sundmaður birtist í Thames-ánni.

Liðin voru hnífjöfn þegar atvikið átti sér stað og var lið Oxford nálægt því að sigla á manninn.

Fréttaþyrla Sky-fréttastofunnar náðu myndum af því þegar maðurinn var fluttur á brott en hann virtist vera skælbrosandi.

Ákveðið var að endurræsa keppnina. Stuttu eftir að róðurinn hófst á ný missti lið Oxford ár fyrir borð.

Vandræðunum var þó ekki lokið því einn liðsmaður Oxford missti meðvitund þegar bátur þeirra nálgaðist endamarkið. Liðsmaðurinn þurfti á læknishjálp að halda en mun ná sér að fullu.

Lið Cambridge bar sigur úr býtum en skólinn hefur unnið keppnina 81 sinnum á meðan Oxford hefur sigrað 76 sinnum.

Hægt er að sjá merkilegan fund háskólaliðanna og sundmannsins hér fyrir ofan.