Benedikt XVI kallar til friðar í stríðshrjáðum löndum

Benedikt páfi XVI hóf páskamessu sína í Páfagarði fyrir stuttu. Rúmlega hundrað þúsund manns eru samankomin á Sankti Péturstorgi til að hlusta á ræðuna.

Páfinn hóf messuna á því að fagna páskunum og bar kveðju til kristilegra samfélaga sem þurfa að þola ofsóknir vegna trúar sinnar.

Því næst hvatti hann stjórnvöld í Sýrlandi til að hlusta á alþjóðasamfélagið og hefja friðarumleitanir við andspyrnumenn.

Benedikt flutti ræðu sína úr altari sem komið hafði verið fyrir utan höfuðkirkju heilags Péturs. Umkringdur blómum biðlaði hann til yfirvalda stríðshrjáðra landa um að vinna að friði.

Þá beindi hann orðum sínum sérstaklega að Afríku en á Malí og í Nígeríu hafa kristnir menn sem og múslimar orðið fyrir hryðjuverkaárásum síðustu mánuði.

„Megi hinn upprisni kristur veita stríðshrjáðum í Austurlöndum nær von og efla þá í endurreisn samfélaga sinna og mannréttinda," sagði Benedikt.

Þá biðlaði Benedikt til yfirvalda í Ísrael og Palestínu um að endurvekja friðarferlið.

Samkvæmt AP-fréttastofunni virtist Benedikt vera afar þreytulegar. Aðeins eru nokkrar klukkustundir frá því að hann flutti aftanmessu. Benedikt verður 85 ára gamall 16. apríl næstkomandi.